Home
દેશ-વિદેશ
કાશ્મીરમાં છેલ્લા 36 કલાકથી સતત વરસાદ અને હિમવર્ષા, હિમાચલ અને મનાલીમાં 12 થી 15 ઈંચ જાડા બરફનો થર જામ્યો, અનેક વાહનો ફસાયાં..!

કાશ્મીરમાં છેલ્લા 36 કલાકથી સતત વરસાદ અને હિમવર્ષા, હિમાચલ અને મનાલીમાં 12 થી 15 ઈંચ જાડા બરફનો થર જામ્યો, અનેક વાહનો ફસાયાં..!

07:52 AM April 30, 2024 admin

Himachal And Kashmir Weather Update : દેશમાં મોટાભાગના રાજ્યોમાં હાલમાં કાળઝાળ ગરમી પડી રહી છે. ત્યારે હિમાચલ પ્રદેશમાં મોસમનો મિજાજ બદલાયો છે. જ્યાં લાહૌલ સ્પીતિના પહાડો પર એપ્રિલ મહિનામાં બરફવર્ષા થઈ છે. હિમાચલ પ્રદેશમાં તાજો બરફ પડતાં પ્રવાસીઓની સંખ્યામાં વધારો થયો છે. જમ્મુ-કાશ્મીરના સોનમર્ગના સરબલ વિસ્તારમાં એવલાન્ચ થયું છે. માછીલમાં ભારે હિમવર્ષાના કારણે છેલ્લા 24 કલાકમાં 12 થી 15 ઈંચ જાડા બરફનો થર જામ્યો છે. આગામી 8 કલાકમાં ઘણી જગ્યાએ ભારે વરસાદ અને કરા પડવાની અને ઉપરના વિસ્તારોમાં ભારે હિમવર્ષા થવાની સંભાવના છે. કાશ્મીરમાં છેલ્લા 36 કલાકથી સતત વરસાદ અને હિમવર્ષા થઈ રહી છે. હવામાન વિભાગે કહ્યું છે કે વરસાદ અને હિમવર્ષાની સ્થિતિ 30 એપ્રિલ સુધી ચાલુ રહેશે. શ્રીનગર પ્રશાસને લોકોને ઝેલમ નદી અને દાલ તળાવ અને અન્ય નદીઓ અને નાળાઓથી દૂર રહેવાની સલાહ આપી છે.

► હિમાચલની નજીકના રાજ્યોમાં ભારે ગરમીની અસર

આ સાથે જ દેશમાં ભારે ગરમીની અસર યથાવત છે. હવામાન વિભાગે આજે ઉત્તર પ્રદેશ, બિહાર, ઝારખંડ, પશ્ચિમ બંગાળ, ઓડિશા, કર્ણાટક, તમિલનાડુ, કેરળ, આંધ્રપ્રદેશ અને તેલંગાણા માટે હીટવેવ એલર્ટ જાહેર કર્યું છે. આ રાજ્યોમાં 3 દિવસ પછી તીવ્ર હીટવેવ આવશે. હીટવેવ એલર્ટ હેઠળના રાજ્યોમાં તાપમાન 42 ડિગ્રીથી ઉપર નોંધાયું છે. આ સિવાય મહારાષ્ટ્ર, મધ્યપ્રદેશ અને છત્તીસગઢમાં પણ 42 ડિગ્રી તાપમાન નોંધાયું છે. જોકે, આ ત્રણેય રાજ્યોમાં હીટવેવની સ્થિતિ નથી. સોમવારે સવારે જમ્મુ-કાશ્મીરના કુપવાડામાં હિમવર્ષા થઈ હતી. જમ્મુ-કાશ્મીરમાં ઘણી જગ્યાએ ભારે વરસાદ અને કરા પડવાની અને ઉપરના વિસ્તારોમાં ભારે હિમવર્ષા થવાની સંભાવના છે.

► ઓડિશા, પ.બંગાળમાં તાપમાન 45 ડિગ્રી સુધી પહોંચવાની શક્યતા

બીજી તરફ ઓડિશા અને પશ્ચિમ બંગાળમાં આજે તાપમાન 45 ડિગ્રી સુધી પહોંચવાની આશંકા છે. રવિવારે આંધ્રપ્રદેશના નંદ્યાલમાં સૌથી વધુ તાપમાન (45.2 ડિગ્રી) નોંધાયું હતું. આ સિવાય રાજધાની દિલ્હીમાં હાલ કોઈ હીટ વેવ એલર્ટ જારી કરવામાં આવ્યું નથી, પરંતુ અહીં ભારે ગરમીની અસર યથાવત રહેશે. હવામાન વિભાગે કહ્યું છે કે દિલ્હીમાં આજે તાપમાન 40 ડિગ્રીની આસપાસ નોંધાશે. વેસ્ટર્ન ડિસ્ટર્બન્સના કારણે આજે જમ્મુ-કાશ્મીર, હિમાચલ પ્રદેશ, ઉત્તરાખંડ, પંજાબ, હરિયાણા, ઉત્તર પ્રદેશ, મધ્ય પ્રદેશ, છત્તીસગઢ, કેરળ, આંધ્ર પ્રદેશ અને ઉત્તર પૂર્વના રાજ્યોમાં વરસાદની સંભાવના છે. હવામાન વિભાગે કહ્યું કે મધ્યપ્રદેશ, છત્તીસગઢ અને ઉત્તર પ્રદેશમાં વરસાદને કારણે તાપમાનમાં કોઈ ઘટાડો થશે નહીં. આગામી દિવસોમાં વધારો થવાની ધારણા છે.

► ઉત્તર ભારતના રાજ્યોમાં હીટવેવથી રાહત મેળવવાનું કારણ

IMDના વૈજ્ઞાનિક સોમા સેન રોયે કહ્યું- ઉત્તર ભારતના રાજ્યોમાં તોફાનની સ્થિતિ સર્જાઈ રહી છે. ભારત પર અફઘાનિસ્તાનથી સક્રિય વેસ્ટર્ન ડિસ્ટર્બન્સની અસરને કારણે, જમ્મુ અને કાશ્મીર, હિમાચલ પ્રદેશ, પંજાબ, હરિયાણા અને દિલ્હીમાં 1 અઠવાડિયા સુધી હીટ વેવ રહેવાની શક્યતા ઓછી છે.